اليوم بلدية جمال قاعدة تحضر في البرنامج الإستثماري التشاركي متع 2021 و الوضع الصحي الراهن فرض علينا منعملوش جلسات المناطق و نتجنبوا التجمعات لكن مع هذا البلدية محتاجة الناس الكل كبار و صغار نساء رجال و شباب تعطي رأيها و تشاركنا و تتفاعل معانا بكل الوسائل في البرمجة و التخطيط على خاطر بكلنا مسؤولين مجلس بلدي و مواطنين و الأطراف المتداخلة، بكلنا نحبو نحسنو و نرتقيو بجودة الحياة متاعنا بكلنا نحبو على الأمن و الطريق المعبد و الترتوار الى يحترم المواصفات المطلوبة و خاصة لذوي الاحتياجات الخصوصية ، بكلنا نحبو على أنهج و أحياء ضاوية،
بكلنانحبو على اماكن يلعبو فيها الشباب بنات و أولاد و أماكن تتفرهد فيها العائلات بكلنا نحبو على مناطق خضراء تساهم في تحسين الواقع البيئي،
نحبو على أنهج نظيفة و بوبالات لا مكسرة و لا محروقة اليوم يلزم نخمموا في مخاطر الطريق و السلامة المرورية
بلدية جمال محتاجة تحمي روحها من الفيضانات و تنسق مع الأطراف المعنية اليوم معادش يلزم نسمعو ببلاعة متعرية كي يجي الريح تتعبى بالفضلات الي في الشوارع و بعد تسد و الماء يدخل للديار اليوم يلزم استراتيجية باش نستحفظو على مياه الامطار الى هي ثروة و هدف من اهداف التنمية المستدامة ، نحبو على بلدية بنفس جديد و روح جديدة مواطنيها هوما الى عندهم سلطة القرار هوما الى يحددو شنو يحبو هوما الى يرتبو أولوياتهم هوما اليوم قادرين يعرفو شنو يصلح بيهم و هذا حق كفلو الدستور و عطاهم حق المشاركة في القرار .... اليوم شنوا تراو أولوية في جمال
#شاركونا_أفكاركم....#تفاعلوا_معانا_بآراءكم
#برنامج_تشاركي_لسنة_2021